Muséu del Ferrocarril

Arte y cultura

Muséu del Ferrocarril d'Asturies

Xixón

La estación de Xixón respuende a un proyeutu redautáu nel 1871 pol inxenieru Melitón Martín pa les llinies d’Asturies y Lleón concedíes a la Compañía del Noroeste. Martín plantegó diferentes edificios agrupaos por categoríes según la importancia de cada parte, dalgo común al planeamientu de les víes del ferrocarril de la época. De toes elles, el modelu de mayor distinción correspondía a les de primer categoría, de les que namái taben previstos dos exemplares, ún en Xixón y otru n’A Coruña.

Los planos concibieron un edificiu de cierta distinción, anque con un planeamientu mui convencional pa esti tipu de construcciones. Asitiáu de forma paralela a les víes, constaba de dos plantes rectangulares bastante allargaes. La inferior contaba con un estragal central del que s’accedía a trés sales d’espera destinaes a les respeutives clases de viaxeros, un restorán y los distintos despachos de circulación. Tol pisu superior taba destináu a viviendes de personal.

Los murios yeren de mampostería enllucío, con sillería nos motivos decorativos (pilastres, zócalu, moldures al rodiu de puertes y ventanes...). La cubierta yera de pabellón, apoyada en cerches metáliques. El conxuntu completábase con una amplia marquesina sobre columnes de fundición que resguardaba l’andén principal.

La estación de Xixón terminóse nel 1874 pa la inauguración del tramu hasta La Pola Ḷḷena. La so hermana gallega concluyó diez años más tarde y valtóse na década del 1960.

L’asturiana corrió meyor suerte. Tuvo en funcionamientu más d’un sieglu, pasando de forma socesiva a manes del AGL, de la Compañía del Norte y, finalmente, de RENFE. Dexó de dar serviciu comercial en xineru del 1990, cuando s’abrió al tráficu la estación nueva de la Plaza de L’Humedal.

L’edificiu rehabilitóse y convirtióse na sede del Muséu del Ferrocarril d’Asturies, qu’abrió les sos puertes nel 1998. Anguaño acueye los despachos, centru de documentación, sala d’esposiciones y almacenes. Ye un exemplu d’estación monumental del sieglu XIX perfeutamente conserváu y un fitu como puntu de partida de la rede de vía ancha del Principáu.

Guillermo Bas Ordóñez

GALERÍA DE IMÁGENES