Tresportes
375445314
Ferrocarril de Langreo
375428265
Muséu del Ferrocarril
522775450
Coches FL H34 y H47
522717503
Automotor FL 203
522717433
Llocomotora FL 30
522717459
Llocomotora FL 46
Esti vehículu posee una estraordinaria historia tanto pola so trayeutoria como pol so orixe: nos años 50 el tresporte de viaxeros per ferrocarril en Los Estaos Xuníos sufría una enorme crisis énte la competencia del automóvil y l’avión. Nesa coxuntura les empreses ferroviaries de los EE XX estudiaron y esperimentaron delles alternatives pa frenar esa decadencia. Una de ellas foi’l New York, New Haven & Hartford, compañía qu’esplotaba la llinia ente Nueva York y Boston.
Ente les opciones que punxo en marcha’l New Haven taba la construcción d’unos automotores diésel destinaos a servicios de cercaníes basaos na teunoloxía del tresporte per carretera. Pa ello contrató cola firma Mack la fabricación d’un prototipu, siguíu d’una serie de nueve vehículos. Básicamente se trataba de la carrocería d’un autobús Mack C-49 montada sobre bogies ferroviarios y dotáu d’una tresmisión llétrica. Foron designaos como FCD, sigles que correspondíen al presidente del ferrocarril, Frederick C. Dumaine.
L’esperimentu fracasó y los vehículos quedaron apartaos a la espera d’un posible comprador. Finalmente, seis de ellos, incluyendo’l prototipu, adquiriólos el Ferrocarril de Langreo, que los utilizó pa modernizar los sos trenes de viaxeros. Recibieron los númberos 201 a 206 y circulaben ente Xixón y La Pola Llaviana acoplaos por pareyes aprovechando qu’ún de los sos testeros tenía una puerta d’intercomunicación.
Tuvieron en serviciu hasta’l pieslle del Langreo pa la so conversión a vía métrica nel 1983. Dos exemplares quedaron apartaos en Xixón y sufrieron un fuerte deterioru que culminó col so desguace. El 203 corrió más suerte, yá que permaneció guardáu nel vieyu depósitu de llocomotores de La Felguera, pero finalmente’l Muséu del Ferrocarril d’Asturies rescatólu y restaurólu, utilizando nel procesu dalgunes pieces de los sos dos hermanos destruyíos.
El 203 ye un vehículu únicu n’Europa, amuesa d’una teunoloxía mui singular y d’un típicu diseñu americanu de mediaos del sieglu XX. Ye, tamién, un esponente de les munches peculiaridaes que tenía’l Ferrocarril de Langreo, por mor, ente otres razones, al so anchu de vía, cercanu al internacional (1.440 milímetros).
GALERÍA D'IMAXES
Comentaris recents