Tresportes
Dientro de la estensa rede de ferrocarriles mineros asturianos atopamos dende llinies pertenecientes a les grandes empresas industriales a otres secundaries esplotaes por sociedaes de menor importancia. Una de ellas foi Minas de La Encarnada, que punxo un ferrocarril na parte alta del valle de Carrocera hasta enllazar col ramal d’Etelvinas, propiedá de Duro Felguera.
Llegó a tener hasta trés llocomotores de vapor pal so serviciu, con un anchu de vía de 650 milímetros. D’elles ensin dulda la más singular foi la postrera, que llevó’l númberu 3 y el nome Luis de Adaro como homenaxe póstumu al famosu inxenieriu de mines, fináu poco tiempu enantes de la so adquisición. Ésta tuvo llugar nel 1917, en plena Guerra Mundial, y poro namái pudo provenir d’un fabricante americanu, nesti casu Vulcan Iron Works.
Yera un exemplar de tamañu pequeñu, con cilindros esteriores, dos exes acoplaos y una amplia cabina pal maquinista y el fogoneru. Ente les carauterístiques más representatives del so orixe estauxunidense ta’l bastidor de barres, un gran farol y una sonora campana de bronce asitiada sobre la caldera y que, desgraciadamente, desapaeció hai munchu tiempu.
El so serviciu consistía nel remolque de trenes de carbón ente’l llavadero de La Güeria y el cargaderu que la empresa tenía en Carrocera, onde’l mineral se tresvasaba a los vagones del Ferrocarril de Langreo. Yera un trayeutu curtiu (apenes tres quilómetros) pero con una importante pendiente pa los convóis vacíos, polo que’l viaxe de vuelta constituyía una dura prueba pa esta llocomotora, conocida popularmente como ‘la yanqui’.
Nel añu 1970 HUNOSA fíxose cargu de les esplotaciones de Minas de La Encarnada y procedió, pocos meses depués, a la so clausura y al esmantelamientu del ferrocarril. La LUIS DE ADARO quedó fuera de serviciu y asitióse como monumentu nos xardinos de los talleres de Santana, onde sufrió un importante empeoramientu, hasta’l so treslláu a les instalaciones del Pozu Monsacro.
Ellí recuperóla la so propietaria hai pocos años, anque la intervención alterió’l so aspeutu orixinal. Ye una pieza única pol so orixe y trayeutoria puede contemplase mientres la visita a les instalaciones del Pozu Sotón.
GALERÍA D'IMAXES
Comentaris recents