Proyeutáu por José Elduayen, primer inxenieru español n’acometer un desafíu de grandor talu, el tramu orixinal comunicaba Xixón con Sama. Nél incluyíense obres de gran importancia como’l planu inclináu de San Pedro o los túneles de Conixho (El Conixu) y Carbayín, toos ellos desapacíos o sustituyíos anguaño. L’anchu de vía escoyíu foi de 1,44 metros y la llinia suponía un llargor de 39 quilómetros.
Posteriormente, la llinia amplióse de Sama a La Oscura (güei L’Entregu) nel 1876 y, finalmente, a La Pola Llaviana, nel 1885. La rede completaríase con dellos ramales que daben accesu a distintos cargaderos mineros, asina como al puertu d’El Musel, hasta algamar unos 62 quilómetros.
El Ferrocarril de Langreo siguió como compañía privada hasta’l 1972, cuando s’integró na empresa pública FEVE. Once años depués la so rede sería convertida a vía métrica pa enllazar col restu de la so rede. Más recién, el so trazáu lletrificóse y vio desapaecer el tráficu carboneru que foi la so razón de ser, quedando pa serviciu de cercaníes. Otres tresformaciones inclúin les socesives modificaciones de la so terminal xixonesa o’l futuru soterramientu ente La Felguera y Sama.
La so importancia patrimonial ta na so propia cualidá como vía histórica, esencial pa entender la historia industrial del Principáu. A lo llargo del so percorríu atopamos numberosos testimonios d’arquiteutura ferroviaria con cronoloxía que va dende los oríxenes del ferrocarril hasta metanes el sieglu XX (estaciones de Sotiello, Pinzales, El Berrón, Sama o La Pola Llaviana). Otros elementos d’interés son dalgunes obras de fábrica menores o instalaciones auxiliares en Sotiello, Curuxona o La Felguera, asina como los vieyos cargaderos mineros qu’apaecen nel trazáu.
Guillermo Bas Ordóñez
Comentaris recents