Pontes de La Maquinilla

Transportes

Pontes de La Maquinilla

Llangréu y Samartín del Rei Aurelio

377157848

Ponte de Sotrondio

Factoría Duro Felguera

372920668

Factoría de Duro Felguera

522717646

Llocomotores Adaro y DF 38

350136363

Ponte de Sama

El ferrocarril xeneral de la Sociedad Metalúrgica Duro Felguera (Smdf) ye una de les víes de comunicación más determinantes na historia del valle del Nalón. Magar que nesta llinia’l tresporte de viaxeros siempre foi llimitáu frente al so usu industrial y que’l so trazáu nunca pasó les llendes de la Cuenca, foi’l complementu insustituyible de la gran Duro Felguera de la primera metá del sieglu XX, que movía a tol valle al so impulsu.

Y ye qu’evacuando producciones, suministrando recursos y comunicando tolos centros de trabayu de la empresa nos conceyos de Llangréu y Samartín del Rei Aurelio esti ferrocarril configuró un espaciu central nel Nalón, claramente identificáu como’l nucleu d’una rexón industrial nacida al rodiu la sideruxa llangreana y les sos mines de carbón. 

La llinia nació de tramos anteriores que la Duro heredará, siendo’l más importante’l de Carbones de Santa Ana, propiedá de la banca Herrero Hermanos, y integrada na SMDF nel 1902 y que, al empar, recibiera d’Hulleras de Santa Ana (1856). De los ameyoramientos fechos polos Herrero a lo último del XIX correspuenden estes pontes, conocíos como de la maquinilla porque la tracción exercíenla máquines de vapor de menor tamaño que les del Ferrocarril de Langreo y el del Norte.

La ponte de Sama ameyoraba la conexón cola planta de la Compañía de Asturias en La Felguera a la que Santa Ana nutría de carbones. El de Sotrondio permitía unviar la hulla de les mines d’El Rimaeru, concesión esplotada por dos propietarios independientes: Herrero y Elorduy. La SMDF potenciará esti ferrocarril, xuniéndolu a ramales propios, como’l de Carrocera. Cola construcción del cable aereu ente’l llavaderu de carbones de L’Entregu y La Felguera nel 1959 entamaría la decadencia de la llinia, que dexa de sirvir a lo último de la década siguiente y la esmantelen poco depués.

Alquiríos polos conceyos de Llangréu y Samartín nel 1973, estes dos pontes conviértense en pasos peoniles, siendo rehabilitaos en dos ocasiones (la primera con aportaciones vecinales), lo que fixo posible que más de 120 años depués de la so construcción, estes queríes pontes sigan sirviendo al so valle.

Faustino Suárez Antuña

 

GALERÍA D'IMAXES