Rampla de Payares

Tresportes

Rampla de Payares

Villamanín - Ḷḷena - Mieres

Nave del Depósito

375467501

Taller de Tractores Eléctricos

375636803

Viviendes del Taller

375447886

Llocomotora Varela de Montes

Túnel de la Perruca

375427634

Rampla de Payares

375463344

Dresina "Piolín"

373210443

Central de Santa Cruz

El ferrocarril de Payares ye, ensin dulda, la obra pública más importante de l’Asturies del sieglu XIX, y una proeza téunica d’algame internacional. Les obres arrancaron nel 1874 pero distintes circunstancies empresariales y téuniques allargaron el so final una década, hasta’l 1884.

La necesidá de salvar un desnivel de cuasi 1.000 metros, nun espaciu xeográficu llendáu y cola imposición de caltener una rampla que permitiera una esplotación sostenible colos medios téunicos del momentu, produxeron una obra de gran envergadura, proyeutu que debemos fundamentalmente al inxenieru Javier Sanz.

Ente les estaciones de La Pola Ḷḷena (Asturies) y Busdongo (Lleón) socédense 69 túneles que representen más de la metá del percorríu de la vía. La rampla máxima ye de 20 milésimes, que se caltién constante per bona parte del trayeutu, lo que también socede coles curves de 300 metros de radiu que permiten al ferrocarril describir dos llazos pa cambiar de sentíu en Malveo y Fierros y un gran arrodiu en Navidiiḷḷu. Nel so conxuntu, apaez como ún de los trazaos ferroviarios más difíciles d’Europa.

Les obres de fábrica señalen el percorríu: los propios túneles coles sos boques de sillería, murios de contención y caltenimientu, infinidá d’arbañales y alcantarielles, etc. A ello amiéstase una coleición de pontes de piedra o de formigón armao, estos últimos sustitutos de mediaos del sieglu XX de los primitivos d’estructura metálica. Per último, un interesante conxuntu d’estaciones, que van dende les orixinales, conservaes en La Pola Ḷḷena o Ḷḷinares, a un conxuntu d’edificaciones de la década de 1920 de gran interés en La Cobertoria, Campumanes y Payares.

Amás, esta llinia foi escenariu de la primer lletrificación a 3.000 voltios na rede ferroviaria de vía ancha española. Dan testimoniu d’ello les subestaciones de La Cobertoria y Payares, y inclusive dalgunos postes de la catenaria que siguen dando serviciu cuasi un sieglu después.

Con tolo anterior, nun debe sorprendenos que la rampla Payares represente una de les obres cimeres de la inxeniería y del patrimoniu históricu industrial del Principáu d’Asturies, anguaño amenazáu pol trazáu nuevu de la variante.

Guillermo Bas Ordóñez

GALERÍA D'IMAXES