Coches de Viaxeros H34 y H47

Afortunadamente, FEVE vendió dalgunos d’ellos a particulares que los reconvirtieron en viviendes, lo que dexó la sobrevivencia de dellos exemplares. Dos pudieron ser recuperaos pol Muséu del Ferrocarril d’Asturies y amuesen los modelos más habituales de los que contaba la compañía (Ferrocaril de Langreo).

El primeru lleva’l númberu H34 y construyóse en Bélxica pola Société Franco-Belge na so fábrica de La Croyère nel 1906. Cuenta con seis departamentos provistos de bancos de madera y separtaos por unos tabiques que lleguen hasta l’altura del respaldu de los asientos, comunicaos al traviés d’un pasillu interior llateral, y una capacidá total de 60 viaxeros. Nun tenía frenu nin calefaición y dotóse años depués de la so puesta en serviciu d’allumáu llétrico.

El segundu exemplar ye’l H47, construyíu nel 1912 pola empresa zaragozana Carde y Escoriaza, siguiendo la estética de los sos antecesores belgues. Nesta ocasión trátase d’un coche mestu, dotáu de dos departamentos de primera clase, dos de segunda y un retrete nel centru. La so estructura ye la mesma, con departamentos independientes, zarraos dafechu y interconeutaos por un pasillu llateral, y asientos tapizaos. Podía tresportar a namái 24 persones y tampoco nun tenía frenu y nin calefaición.

Entrambos dos constitúin una muestra escelente de les espartanes condiciones de viaxe qu’esperimentaben los pasaxeros nos trenes de lo último del sieglu XIX y entamos del XX. Tán equipaos con estribos corríos nel esterior, que permitíen tanto l’accesu de los viaxeros dende los andenes baxos que teníen les estaciones naquella época como’l tránsitu de los interventores cuando los coches nun contaben con intercomunicación.

Guillermo Bas Ordóñez