Llocomotora HT 14

Esta máquina construyóse nel añu 1942 nes instalaciones de Sestao de la empresa Altos Hornos de Vizcaya, sociedá de la qu’Hulleras del Turón yera filial y cola que caltenía, poro, estrechos llazos empresariales y teunolóxicos.

Basábase nun diseñu fechu nel 1915 pola firma estauxunidense H. K. Porter nun momentu nel que los constructores europeos, tradicionales proveedores de llocomotores al nuesu país, nun podíen suministrales. Nos años de la Primer Guerra Mundial llegaron los dos primeros exemplares, a los que s’aunió un terceru construyíu tiempu depués polos talleres de La Cuadriella.

Finada la Guerra Civil, l’aumentu nel tráficu carboneru énte’l periodu d’autarquía económica fixo necesario ampliar el parque motor. Como les sos instalaciones nun taben en condiciones de facelo recurrióse a la empresa matriz, que suministró cuatro máquines, la 14 precisamente la primera d’elles. Tiempu depués pondríense en serviciu dos más, una fabricada por Altos Hornos de Vicaya y la última, que facía’l novenu exemplar de la familia, polos talleres de Turón.

Col restu de les hermanes, la 14 tuvo destinada la mayor parte de la so vida a la tracción de trenes carboneros na llinia qu’aunía’l llavaderu de La Cuadriella con Fortuna. Compaxinaba esti llabor con otros cometíos auxiliares, como’l remolque de coches de personal, de meses madera, etc.

Hacia l’añu 1970 HUNOSA treslladóla a Sovilla, onde circuló per pocos años hasta concluyir la so carrera cola llegada de los tractores diésel. Colocóse como monumentu y, nel 2002, llevóse al Pozu Monsacro, llugar nel que ta anguaño. Ye una de las pieces más representatives del patrimoniu ferroviariu asturianu, como testimoniu de la rede de vía estrecha del valle de Turón.

Guillermo Bas Ordóñez