Llocomotora SHE D

Tresportes

Llocomotora SHE D

Ecomuséu Mineru de Samuño, Llangréu

527488872

Llocomotora SAF Nº1

375422264

Llocomotora SHE 5

371694243

Ecomuséu de Samuño

522717412

Llocomotora SHE D

375428265

Muséu del Ferrocarril

La Sociedad Hullera Española tuvo dos sistemes de numberación del so parque de llocomotores de vapor. Les que daben serviciu na llinia principal llevaben númberos, del 1 en delantre. Pela cueta, aquelles destinaes a les trincheres de los grupos mineros de monte taben identificaes con lletres, entamando cola A, B, etc.

Esta última serie llegó a contar con hasta cinco exemplares, de los que los dos últimos (lletres D y E) entrególos nel 1920 la firma alemana Maffei, copiando’l modelu usáu tiempu atrás na llocomotora B. Adquiriéronse pa circular pel ferrocarril del quintu pisu del grupu Legalidad, perriba de la población de Morea. Como nel so percorríu teníen que travesar tres túneles, taben equipaes d’orixe con una llamadera cabina d’altura mui reducida. El restu de los sos elementos yera bastante convencional, con dos exes y tanque d’agua nel bastidor, carauterístiques habituales nesti tipu de llocomotores.

Antes de la Guerra Civil, la D treslladóse al tercer pisu del grupu Conveniencia, en Valdefarrucos. Ellí nun esistíen problemes de gálibu, polo que recibió una cabina más convencional. Finalmente, nos años 40 crució El Río Ayer pa dar serviciu na escombrera del tercer pisu del grupu Marianas, onde circuló hasta metanes de los sesenta.

HUNOSA proporcionó-y una restauración cosmética y unvióla como monumentu a los xardinos del Pozu San Jorge, onde tuvo cuasi trés décades. Nel añu 1999 cedióse al Muséu del Ferrocarril d’Asturies, qu’acometió una reparación funcional que fixo posible que volviera a circular.

Dende entós non solo circuló peles víes de la institución xixonesa, de la que se convirtió  nún de los sos símbolos, sinón que llegó a rodar pel tramu de superficie del recuperáu ferrocarril de Samuño, en Llangréu. Esi fitu marcó la vuelta de la tracción vapor a una llinia minera de les cuenques asturianes depués de más de cuarenta años, tou un símbolu de la recuperación del patrimoniu industrial del Principáu.

Guillermo Bas Ordóñez

GALERÍA D'IMAXES