Minería
El Pozu San Jorge, afondáu pola Hullera Española nel 1940-1942, ye ún de los pocos exemplos que tenemos n’Asturies de la intervención d’un arquiteutu nel diseñu d’unes instalaciones mineres. Enrique Rodríguez Bustelo diseñó un pozu na llinia que trabayaba naquel momentu, mui averada a los presupuestos del Movimientu Modernu, de pureza grande y cenciellez de formes. Escenariu de movilizaciones importantes en contra de los recortes y en defensa del futuru de la minería, dende’l 2018 les sos instalaciones caltiénense trancaes.
Nel valle del ríu Ayer la hexemonía minera foi de la Sociedad Hullera Española dende la so creación nel 1892 hasta la so integración n’Hunosa nel 1967. La SHE manexaría y ordenaría’l territoriu ensin obstáculos, pudiendo sintetizalo en trés árees bien definíes: l’espaciu de producción, colos pozos San Antonio, Santiago y San Jorge, na parte alta; l’espaciu de residencia, col Pobláu de Bustiello y otres promociones residenciales, na zona media; y l’espaciu de espedición y alministración, na desaguada del ríu Ayer nel Caudal, entre Sovilla y Uxo, onde s’asitiaben el llavaderu, cargaderos y oficines diverses.
El Pozu San Jorge, abiertu nel 1942, ye’l primeru de los pozos verticales afondaos nel ríu Ayer, siendo ún de los pocos y valiosos exemplos que tenemos na minería del carbón rexonal de la intervención nel so diseñu d’un arquiteutu, Enrique Rodríguez Bustelo, ún de los profesionales más afamaos de la arquiteutura asturiana del sieglu XX. Bustelo firma los proyeutos de dellos edificios, como la casa de máquines, la sala de compresores, les oficines o l’embarque, que son los que nos llegaron anguaño. Toos ellos caltienen una coherencia formal de conxuntu, siendo llevantaos en formigón con llucíu de plaqueta nunes muries onde s’abren ventanales amplios, de disposición vertical na casa de máquines y horizontal nel restu pal meyor aprovechamientu de los espacios interiores en función del so destín. La cubierta de seición curva, tanto al interior como al esterior, ye ún de los elementos más carauterísticos de les instalaciones del pozu y que-yos otorguen, en mayor midida, una unidá.
El castillete caltién la celosía metálico roblonao col que se diseñó, siendo ún de los exemplos postreros d’esta téunica que daría pasu nos años siguientes a la soldadura llétrica.
Nel 1995 el Pozu San Jorge pieslla, concentrándose la producción nel cercanu Santiago, reforciáu con una torre d’estraición y un skip. Les funciones alministratives, l’aire comprimío asina como la entrada a les instalaciones siguiría faciéndose pel San Jorge hasta la clausura definitiva de les instalaciones nel 2018.
GALERÍA D'IMAXES
Comentaris recents