Tresportes
Ún de los elementos más sobresalientes, non sólo del patrimoniu ferroviariu asturianu, sinón de la historia industrial española, ye ensin dulda la llocomotora PALAU. Rescampla d’ella’l fechu de que foi la primer máquina d’anchu ibéricu construyida n’España, yá que salió de los talleres de La Maquinista Terrestre y Marítima de Barcelona nel 1887, cuando la fabricación d’esti tipu de material taba en fase embrionaria nel nuesu país.
El so destinatariu orixinal taba mui próximu: el ferrocarril vecín de Sarrià a Barcelona. Nel 1906 esta llinia lletrificóse y convirtióse a anchu de 1.435 milímetros, polo que la PALAU vendióse, xunto cola so hermana ximielga, al Mollet-Caldas, qu’esplotaba una llinia de redolada pequeña al norte de la capital catalana. Ellí tomó’l so nome actual, yá que la población de Palau de Plegamans yera una de les estaciones del so percorríu.
Esti pequeñu ferrocarril quedó fuera de serviciu a entamos de los años trenta, pero la PALAU sobrevivió hasta ser adquirida por Renfe nel 1941. Pocu tiempu depués llegaría a Asturies pa facer maniobres nos numberosos apartaderos mineros que marcaben les víes de la Red Nacional. Finalmente, nel 1964 vendióse a la Sociedad Hullera Española cola fin de dar serviciu nel llavaderu de carbones de Sovilla, onde pasó llueu a Hunosa.
Poseye trés exes motores, distribución interior y tanques llaterales d’agua, con una elegante cabina zarrada. El so diseñu, de llinies agradables, tien una llonxana inspiración inglesa sorprendentemente tomada de les llocomotores alemanes Hohenzollern que La Maquinista taba construyendo al empar con destín al Ferrocarril de Langreo.
Retirada del serviciu nel 1981 tres nueve décades n’activu, permaneció en Sovilla hasta’l so rescate por parte del Muséu de la Minería, onde se pue contemplar anguaño nes sos instalaciones.
GALERÍA D'IMAXES
Comentaris recents