Central d’Arenas

Ente los años 1952 y 1958 prollónguense los trabayos constructivos del saltu. L’agua, captada na presa de Poncebos, desciende per aciu de tuberíes a la central, un edificiu de formigón visto integráu por dos volúmenes dedicaos a sala de turbines y cuadru de mandos. La sala de máquines organízase estructuralmente a partir de pórticos de formigón armao qu’incorporen pilares llixeramente troncocónicos, carpintería metálico y amplies vidreres n’altura, buscando la máxima tresparencia. El cuerpu llateral acueye’l cuadru de mandos, xunto cola sala de personal y los despachos; dependencies, toes elles, bien allumaes y, lo que ye más importante, permeables, abiertes al disfrute del paisaxe.

Na fachada principal hai un voladizu de formigón, con remate n’ángulu, de vuelu ampliu y destacáu interés plásticu. Módulos revestíos de gresite, trataos como xardineres, y trés chimenees exentes de ventilación, de sabor organicista, completen la composición.

L’arquiteutu Castelao ocúpase, como ye habitual en cuasi tolos sos trabayos, del diseñu del mobiliariu interior, fechu en formica, de les lluminaries, de la llixera escalera de madera con estructura metálico, ente otres pieces, mimando caún de los detalles del conxuntu. Mientres, a Antonio Suárez, ún de los sos collaboradores habituales, correspuende-y el diseñu d’una vidrera artística instalada nel testeru del estragal. De seición trapezoidal, con armadura de formigón, llevántase a cuatro metros d’altor. Subdivídese en pequeños vidros irregulares de distintes testures: tresparente, tresllúcido, esmerilao y rayao, cubiertos con plásticos de colores primarios.

Natalia Tielve García