Industries
El pobláu de La Lluz foi una consecuencia de les polítiques urbanístiques desendolcaes n'Avilés tres la llegada al conceyu de la gran industria a mediaos del sieglu XX. Poblaos como el de Llaranes, perfectamente planiáu, quedaren pequeños p’allugar la gran cantidá de persones llegaes a la ciudá de la mano de les promociones industriales recién nacíes.
L'empresariu Domingo López Alonso vio la oportunidá de proyeutar un núcleu modernu y de nueva centralidá nel monte La Xungarosa dotáu con amplies zones verdes, tou tipu de servicios y grandes edificios de viviendes nos que predominaben les plantes en forma d'estrella. La maqueta d’aquel barriu de suañu plasmara a les autoridaes y acabó derivando nun proyectu menos ambiciosu y radicalmente opuestu al inicial, una operación especulativa bien clara. ENSIDESA (Empresa Nacional Siderúrgica, S.A.) acabó mercando los edificios construyíos col fin d'agospiar a una parte de los sos miles de trabayadores.
Los inmuebles, de planta rectangular y adosaos ente sí, tán dispuestos aprovechando l'enclín del terrén como si fueren curves de nivel. Les viviendes, con una superficie d’unos cincuenta metros cuadraos, tán dotaes de tres habitaciones, salón, cocina y bañu. Toles estancies, d'amenorgaes dimensiones, tán distribuyíes a entrambos llaos d'un pasiellu central.
Nel pobláu destaquen pol so interés arquitectónicu otres dependencies d'usu comunal inauguraes tres la llegada de los primeros inquilinos. La ilesia de San Pablo y el so llar parroquial tán incluyíos nel rexistru de la Fundación Docomomo Ibérico y allúguense na fachada principal del barriu, na so parte más baxa. Esti proyectu ye obra del arquitectu Efrén García Rodríguez nel añu 1965. Al igual que l’institutu Virgen de la Luz o la biblioteca, tien un calter funcional bien marcáu y venceyáu al Movimientu Modernu. Nestos edificios predominen la sinceridá de les formes y de los materiales emplegaos, amás de los grandes ventanales qu’allumen los espacios interiores.
GALERÍA D'IMAXES
Comentaris recents