El Patrimoniu Industrial de la lletricidá

Les demandes de la sociedá industrial, la mecanización, l’equipamientu téunicu, los suministros, l’aumentu de la población y el desendolcu urbanu, afalaron la imparable meyora de la industria enerxética. N’Asturies, el puxu que’l suministru llétricu conoció avanzáu’l sieglu xix tuvo íntimamente xuníu al desendolcu de la industria carbonífera, cola qu’hemos venceyar los primeros grupos térmicos asitiaos n’Asturies. La xeneración de lletricidá en forma de corriente alterno, entráu’l sieglu xx, fixo posible tresportar enerxía a gran distancia, producir a escala masiva y, arriendes d’ello, potenciar la producción d’enerxía hidráulico. Los saltos d’agua de Somiedu sobre manera la central de La Malva, activa dende 1917, constitúin esponentes almiraderos d’esti procesu. La promoción de grandes aprovechamientos hidroeléctricos, incentivada nos años del franquismu, tuvo como finxu esencial la titánica construcción del Saltu de Salime, obra declarada d’absoluta prioridá nacional, indispensable estratéxicamente pa la meyora del suministru d’enerxía.

A esta siguiríen otres monumentales unidaes, entamaes por Hidroeléctrica del Cantábrico y, al igual que la central de Salime, maxistralmente interveníes por Vaquero Palacios: Miranda, Proaza, Tañes y Aboño, esta postrera, termoeléctrica. Frutu de la estrecha collaboración de profesionales asemeyaos, los saltos de Silvón, Arbón y d’Arenas de Cabrales promovíos por Electra de Viesgo, cuntaron cola cualificada intervención del arquiteutu Álvarez Castelao, l’inxenieru Elorza y el pintor A. Suárez.

La rellación de l’arquiteutura cola so redolada, el diálogu cola inxeniería, la incorporación de les artes plástiques y el diseñu –temes plantegaos por dalgunos de los principales teóricos y facedores del Movimientu Modernu– resuélvense espléndidamente nestes obres, dando como resultáu un llabor integrador que constitúi ún de los testimonios más notables del Patrimoniu Industrial asturianu.