Resulta interesante sobre manera la solución de fachaes de la central, concebida a mou de monumentalcarcaxa. El volume prismáticu, con una estructura constituyida por grandes soportes y vigues de sofitu pala ponte grúa, ye recubiertu por una plegadura de pieces llaminares de formigón visto. La solución de zarramientu, el tonu brutalista de les facetes de formigón aristaes, asitiaes nuna superficie quebrada y desarrollable, con xuegos clarescuristes enfáticos, xenera una sensación de movimientu poderosa.
Nún de los murios testeros colócase un gran panel escultóricu. Confórmenlu dieciséis relieves de formigón de formatu abultáu, fixaos con anclaxe y empotraos nel muriu, que recueyen representaciones esquemátiques de signos que rellacionen l’home y la naturaleza. Nel interior, seis pintures sobre paneles
de madera reproducen, sintéticamente, elementos venceyaos cola lletricidá. Un mural d’amplies dimensiones, presidiendo la sala de mandos, representa un campu magnéticu.
Al igual que n’otros trabayos d’integración, Vaquero Palacios reutiliza materiales emplegaos na construcción, como restos de víes férrees y tubos, pa la realización de relieves y escultures. La escalera que da entrada a los alternadores ta fecha n’aceru y los pasamanes ellabórense a partir del cobre que
s’utiliza pa les llinies d’alta tensión. La mano del artista estiéndese al diseñu de les carcaxes pa los alternadores y al mobiliariu del cuadru de mandos, comprendiendo meses, armarios, llámpares, pupitres y otros dispositivos. Nada queda al azar; función y guapura tán harmónicamente integraos dando como resultáu una obra d’arte total.
Natalia Tielve García
Comentaris recents