La vivienda obrera promovida poles empreses mineres asturianes

Dar agospiu a una población obrera qu’aumentaba na mesma proporción que lo facía l’actividá minera, convirtióse nuna prioridá pa les empreses mineres asturianes.

La mayor actividá constructiva coincide con momentos nos que la demanda de carbón yera mui alta y esixía un gran incrementu de la mano d’obra que se vía obligao a apiñase en viviendes cares, escases y ensin unes condiciones mínimes d’hixene.

La carauterística xerarquización d’espacios dientro de les esplotaciones mineres tien el so reflexu na planificación de les viviendes. D’esti mou, cada grupu profesional tenía un agospiamientu acordies col llugar qu’ocupaba na empresa.

L’allugamientu de les viviendes ye pervariáu. Consérvense pequeños asentamientos aisllaos, propios de la minería de monte, como’l pobláu de Rioseco en Riosa. N’otros casos alcontramos viviendes inxertes n’espacios multifuncionales, como La Cuadriella en Turón, o asitiaes na contorna de les esplotaciones como Solvay, Lieres, o La Nueva, Llangréu. Podíen tamién inxertase nel texíu urbano de les poblaciones cercanes a los centros de trabayu o n’espacios periféricos con respeuto a elles, como’l pobláu de Barreos en Llaviana o’l de Returbiu en Mieres, dos amueses, amás, de promociones de viviendes del periodu autárquicu.

Tipolóxicamente atopamos exemplos que van dende los cuarteles más elementales hasta viviendes unifamiliares de lluxu pal personal direutivo. Dacuando, recurrióse a soluciones constructives inspiraes na casa tradicional del mundu rural asturianu; n’otros importáronse modelos foranos, como’l que s’afita na ciudá-xardín británica, con exemplos como les Cases de los Xardinos de La Cuadriella en Turón.

N’Uxo y Figareo, nel conceyu de Mieres, alcontramos una de les tipoloxíes más interesantes. Son edificios de gran desendolcu horizontal, dellos pisos n’altor y un corredor que percuerre la fachada principal hasta dar nuna escalera adosada a ún de los murios llaterales.