Antigua Mantequería Arias

Nesti contestu ha enmarcase la fábrica antigua de nome Hijos de Antonio Arias, fundada nel 1848-1849, que ye la casa fundacional de l’actual firma Arias. Ta asitiada en Courias (Pravia), sobre’l trazáu vieyu de la carretera, lo que nun foi casual, sinón que lo buscó’l fundador p’algamar una ventaya de llocalización na receición de les materies primes y l’unviu de los productos finales. La planta preparaba la mantega mercada a los aldeanos nos mercados próximos, comercializándola en cuidaes lates baxo dos marques: La Pastora y La Praviana. Con esta última diversificaríen el negociu cola fabricación de sidra axampanao, a partir tamién de la bébora producida polos llabradores. Una llinia que desarrollaríen cola merca de la fábrica El Pelayo de L’Infiestu y tamién col crecimientu de les instalaciones fundacionales pravianes. A lo poco los dos herederos separtaríen los negocios ente la rama de Courias, Antonino Arias, y la uviéina, Ángel Arias, que sería la que mayor medra esperimentaría, llegando a absorber a la rama del so hermanu, pa ser alquiríes nel 1967 por un grupu financieru internacional que, sicasí, caltuvo la marca Arias. 

La planta de Courias ta formada por unos edificios de diferentes époques, necesidaes y enfotu, pero mantienen una coherencia grande, y los materiales –piedra y lladriyu–   combinen, como la propia actividá agroalimentaria, lo rural y lo industrial, la solidez y la versatilidá, la calidá y la economía..., faciendo d’esta planta una discreta pero escelente muestra na so rama. Tres décades d’actividá, les instalaciones acondicionáronse pa un hotel rural curiosu. 

Faustino Suárez Antuña