Astilleros Ojeda y Aniceto

Nel añu 1897 entama la so actividá nel fondiadoriu de San Xuan un astilleru de ribera pequeñu de calter familiar. Propiedá de los hermanos Antonio y Aniceto Fernández Hevia, oriéntase hacia la construcción y reparación d’embarcaciones de madera y de tonelaxe reducíu. La goleta ‘Javier’ ye la primer obra mayor que produz, malapenes inauguráu’l sieglu XX. 

A midida qu’avanza la centuria l’astilleru evoluciona hacia una estructura empresarial más complexa y va ampliando y modernizando les sos instalaciones cola construcción de carros-varaderos, grades, parrilles, talleres y otres dotaciones complementaries. De forma paralela, instálense nel fondiadoriu otres empreses dedicaes a la construcción naval y a la reparación de buques, como les sociedaes Fernández y Álvarez, Morán Quirós y Co. o Iglesias y Martínez. Bona parte de los terrenos ocupaos por estos astilleros quedarán en manes d’ENSIDESA y d’ENDASA.

Nel 1974 la titularidá de les concesiones del antiguu establecimientu de Fernández Hevia recai n’Astilleros Ojeda y Aniceto, S. A., que dirixe la so producción a la construcción de pesqueros y buques multifunción. Cola lliquidación de la sociedá, constitúise la firma Astilleros Ría de Avilés, S. L., nel 1992. Dedicada a la construcción d’embarcaciones con cascu d’aceru, la empresa promueve un espaciu productivu nuevu, con talleres de calderería, soldadura y mecanización, con funcionamientu que se caltién güei.

Como testimoniu de l’actividad de los antiguos astilleros consérvase una nave destinada a taller de carpintería. Tres baraxar dellos proyeutos encaminaos a la so reutilización – como la ubicación d’una escuela de vela o un espaciu de restauración–, la propuesta fecha, de manera reciente, foi la so reconversión en Centru d’Interpretación del Puertu d’Avilés, siguiendo’l proyeutu de los arquiteutos Rogelio Ruiz y Macario Astorga. Como resultáu de l’actuación, los antiguos portones d’accesu pa materiales que furaben les muries llaterales de la nave tresformáronse en ventanales proyeutaos sobre la ría, los cais y el pobláu de San Xuan. 

Rubén Domínguez