Bateríes de Fornos de Coque

Inauguróse’l 1 de setiembre del 1956 y nes diferentes construcciones que la componen participaron los inxenieros Amalio Hidalgo, Alberto Mallol y J. Ortuño, en base a les traces orixinales del alemán Oscar Weber (de la empresa Didier).

Nes sos instalaciones producíase coque pa suministrar el combustible necesariu a los cuatro fornos altos, amás de la obtención de productos derivaos de la coquización. Les bateríes edificáronse en dos fases, sumando finalmente un total de diez con trescientos fornos. El carbón, procedente del parque de carbones, distribuyíase peles cintes tresportadores y almacenábase nes torres de carbón. D’estos silos pasaba al carru de carga, que lo distribuyía en caúna de les cámares dende la parte superior. En pasando dieciséis hores a temperatures superiores a los mil graos, la desfornadora emburriaba el coque contra l’otru llau del fornu, onde lo recibía’l vagón d’apagáu, que lo conduciría hasta les torres d’apagáu. Ellí esfrecíase con agua, provocando les escomanaes columnes de vapor carauterístiques del cielu avilesín. Finalmente, el combustible conducíase per cintes tresportadores hasta l’edificiu de cribaderos, onde se clasificaba por tamaños. El conxuntu de los fornos complétenlu cinco chimenees de formigón armao. 

Amás, el recintu cuenta con dependencies auxiliares como los almacenes xenerales, el taller mecánicu o les oficines, de valor fuera de dulda. A consecuencia del procesu anteriormente señaláu producíense los llamaos subproductos, como’l benzol, l’amoniacu, l’alquitrán y la naftalina. 

El fornu postreru estrayóse’l 30 de setiembre del 2019, cesando asina la producción del últimu restu de la desaniciada ENSIDESA nel conceyu d’Avilés. Magar que nun cuenta con proteición patrimonial, la totalidá de la planta forma parte del Plan Nacional de Patrimonio Industrial y desendolcóse un movimientu de defensa que pide la conservación, proteición y reutilización de les bateríes.

Rubén Domínguez Rodríguez