La Central Termollétrica d’Aboño tien dos unidaes xeneradores: Aboño-1, puesta en serviciu’l 15 de marzu del 1974, y Aboño-2, inaugurada’l 23 de setiembre del 1985. Dambes permiten utilizar de manera simultánea dellos tipos de combustibles: gases escedentes de los fornos altos y de les bateríes de coque de la planta siderúxica de l’antigua UNINSA –anguaño ArcelorMittal– asitiada na so redolada; fueloil; y hulla, disponiendo d’enllaz al traviés de la cinta tresportadora col Parque de Carbones d’Aboño y del tramu ferroviariu que coneuta col muelle de carbones del Puertu d’El Musel.
A Joaquín Vaquero correspuénde-y facer la ordenación estética de la primera de las unidaes, Aboño-1, dotada con una unidá monobloque de 365,5 MW, fabricada pola firma Brown Boveri. El turbo-alternador, bautizáu como Marisa, presenta un singular revestimientu polícromu diseñáu por Vaquero que, n’atención a la so calidá estética, foi incorporáu como seña d’identidá de la prestixosa firma suiza. No que respeuta a la ordenación esterior, Vaquero enfréntase a un complexu d’estructures funcionales al que-y da un orde estéticu. Sírvese del color como recursu fundamental, con referencies formales al Neoplasticismu holandés.
L’artista asume tamién el proyeutu del Edificiu de Servicios Auxiliares, asitiáu nel corazón del complexu. Trátase d’un volume prismáticu qu’acueye los despachos y estudios del personal téunicu. Dispónse a dos altures, valorando l’espaciu interior per aciu’l vacíu que coneuta visualmente les dos plantes. La sala de calter polivalente, dispuesta na planta inferior, con illuminación cenital per llucernariu, destina a la celebración ocasional de xuntes. Con esta fin, l’artista fai’l diseñu d’un inxeniosu mobiliariu modular. Nesti espaciu singular dispónense amás dos murales de cobre bruñío, asitiáu a dambos llaos, que suxeren de forma esquemática trabayos de montaxe y llinies llétriques.
Natalia Tielve García
Comentaris recents