Industries
La central hidroeléctrica de Silvón (1955-1958), destinada al aprovechamientu del ríu Navia, promovióla Electra de Viesgo, S.A. y foi proyeutada pol arquiteutu Ignacio Álvarez Castelao en collaboración col inxenieru Juan José Elorza y l’artista Antonio Suárez.
La central ye alimentada pola presa del banzáu de Doiras, asitiáu agües abaxo del de Salime. Cuenta con dos grupos xeneradores, Silvón I y Silvón II, qu’entraron n’esplotación nel 1959 y 1964, de manera respeutiva.
L’edificiu de la central, de muros de formigón recios, organízase nun volume principal, onde s’asitien la sala de máquines y el taller. Un cuerpu llateral agospia’l restu de les dependencies. Ún de los sos mayores llogros ye’l tocante a la utilización y el manexu de la lluz, tanto nel interior como nel esterior. Asina, na sala de máquines, sirviéndose de los mechinales dexaos polos andamios al encofrar, configúrase un panel llumínicu impautante. Unes lluminaries de formigón prefabricao, colocaes nel esterior, baxo los bancos y nos remates d’antepechos, tamién de formigón, enfaticen la visión de nueche de la central.
Castelao ocúpase coles mesmes del diseñu de mobiliariu y confía al artista Antonio Suárez un conxuntu d’intervenciones plástiques que complementen el so llabor. Trátase d’una vidrera monumental que percuerre en tola so altura la parede del frente del taller, un zócalu de material plástico nos murios llaterales, basáu nuna combinación esquemática de colores vivos y contrastaos, y una representación pictórica de la Virxe de la Lluz, asitiada na zona d’estragal, de factura facetada y acusada viveza cromática. Resulta particularmente singular la vidrera, formada por dos tramos n’altura, separtaos por una viga de formigón y organizada en catorce bandes verticales. Basándose en principios xeométricos, los colores articúlense siguiendo ritmos pautaos, quedando reservaes les games d’azul y de verde pal centru y asitiando’l coloráu, esmembráu a base de diagonales, nos estremos.
GALERÍA D'IMAXES
Comentaris recents