Tresportes
Esti interesante exemplar fabricólu nel 1928 la firma guipuzcoana Herederos de Ramón Múgica, d’Irun, como un coche de tercera clase pa la Compañía del Norte, onde recibió el númberu Cfhv 2108, integrante d’una llarga serie de 158 vehículos. Al pasar a manes de RENFE matriculóse Chv 1708 y años más tarde, cuando yá nun yera necesario nel parque comercial, tresformóse en vehículu de socorru cola identificación SA 706.
Esta práutica foi mui habitual en RENFE, qu’utilizaba coches de viaxeros vieyos pa convertilos en vehículos de serviciu pa cometíos diversos.
Ye un coche de dos exes provistu de caxa de madera. Nel so orixe tenía seis departamentos y mediu y un llavabu na zona central, too ello comunicao per un pasillu llateral, y tenía capacidá pa 67 viaxeros. Como yera habitual nos vehículos de tercera, los departamentos nun contaben con puertes interiores y nun teníen tabiques de separtación propiamente dichos, sinón que yeren los respaldos de los asientos los que facíen esa función. L’allumáu yera de gas, posteriormente sustituyío polo llétrico, y contaba con calefacción por vapor.
Estos coches usáronse nun principiu en trenes de viaxeros de tou tipu, incluyíos expresos o correos, pero cola llegada d’otros más modernos quedaron arrequexaos a servicios secundarios.
Con motivu de la so tresformación caltuvo la silueta esterior, incluyíu’l techu de perfil elípticu. L’interior, sicasí, foi mui alteriáu, provistu de cuartos, comedor y sala d’aconceyamientos p’abellugar al personal nos sos desplazamientos. Foi al serviciu de Material remolcao, destináu a Xixón, pa intervenir en casu d’accidentes, reparaciones de vehículos, etc.
Finalmente RENFE cediólu al Museo del Ferrocarril de Asturias, que procedió a la so rehabilitación, y figuró ente’l material espuesto dende l’apertura de la institución. Llegó a salir d’ella pal rodaxe de dalguna película, de nuevo rodando sobre les víes de RENFE.
Son mui escasos los coches de viaxeros de dos exes conservaos n’España, polo que’l SA 706 ye un vehículu d’un altu valor patrimonial, representante de la mayor serie de pasillu parcial que circuló pel nuesu país.
GALERÍA D'IMAXES
Comentaris recents