Conserves La Arenesca

El so allugamientu na población naviega de Veiga yera afayadizu pal desendolcu de les actividaes industriales principales: la fabricación de salazones, conserves y escabeches. Al igual qu’otros trabayos asociaos a la mar, como la reparación de redes, el de la conservera desendolcábenlu muyeres dende edaes tempranes.

L’edificiu ye de planta rectangular, de perfeuta simetría nel so alzáu principal. Ta compuestu por dos dependencies llaterales de grandes dimensiones que conflúin nel accesu principal, asitiáu nel centru. El mesmu compónse d’una doble puerta coronada por un frontón mistillinial arrodiáu por una pareya de boles, que tamién atopamos nes esquines del inmueble. Toles fachaes del edificiu tán molduraes y, ente vanos, presenten faxes.

Anguaño, tres la so rehabilitación, acueye la sede de la Casa de Cultura de Veiga.

Rubén Domínguez Rodríguez