Industries
L’asentamientu de Gijón Industrial coincide cola llegada del sieglu XX. Impulsada por dos indianos procedentes de Cuba (Antonio Díaz Blanco y Antonio Quesada), la firma asítiase na zona oeste de Xixón, plantegando de primeres una doble orientación productiva: la ellaboración de vidru y de fariña. Mientres que la fariñera apenes tuvo unos pocos d’años en funcionamientu, la fábrica de vidru llegó a contar con un llargu desarrollu temporal.
Modificada la so razón social, Gijón Fabril constitúise nel 1915 pa dedicase a la producción de vidru plano y de botelles. Contaba con enllaz direutu col Ferrocarril del Norte, una central térmica qu’aseguraba’l suministru enerxéticu, fornos, molinos onde se preparaben los materiales necesarios pa la fabricación de vidru, talleres mecánicos pa la ellaboración y conservación de moldes de botelles, instalaciones pa la producción de lladriyos refractarios, almacenes, naves d’espedición, dependencies alministratives, botiquín, chigre y, pa la formación de los trabayadores, la so propia escuela d’aprendices. A too ello añadíase la dotación de viviendes pa operarios y emplegaos.
A lo último de la década del 1960 la empresa absorbióla la Compañía General de Vidrieras Españolas y nel 1981 adquier la denominación nueva de Vicasa (Vidrieras de Castilla S.A). L’actividad treslládase entós al polígonu industrial de Porceyo. Como resultancia, les instalaciones esmantélense –los terrenos tán güei ocupaos por un centru comercial y d’ociu– y únicamente se caltién l’inmueble destináu a acoyer dependencies alministratives.
L’edificiu d’oficines conserváu, llevantáu nel 1905, con fábrica de mampostería y lladriyu, organízase en dos cuerpos auníos per un arcu de celosía metálico que protexe la entrada principal. Con planta rectangular y cubierta a cuatro agües, distribúise en dos pisos d’altor, incorporando sobráu con mansardes. Llueu d’años ensin usu, rehabilitáu a iniciativa municipal, acoyó per un tiempu un centru de formación. Anguaño baráxase un proyeutu nuevu d’acondicionamientu como albergue de pelegrinos.
GALERÍA D'IMAXES
Comentaris recents