Industries
A lo primero del sieglu XX abre les sos puertes una fábrica de vidru güeco, patrocinada pola sociedá J. Ramírez y Cía., na zona oeste de Xixón –barriu actual de La Calzada–, un área con una actividá industrial intensa, prollongada a lo llargo de la centuria, que s’esplica pola so situación ventayosa, en particular, por mor de la cercanía al puertu d’El Musel y l’afayadiza comunicación ferroviaria.
Depués de non poques complicaciones, les instalaciones fabriles pasen nel 1947 a manes de la sociedá anónima Cristalerías Asturianas (Cristasa). La empresa, orientada a la producción de vidru y de cristal nes variedaes de plano, güeco, doblao y prensao, contaba ente les sos dotaciones con fornos de recalentáu y templáu, talleres de esbastáu, pulíu y talláu. Ente otros oxetos, fabricaba llámpares y arañes d’allumáu, amás de pieces decoratives. Entamada la década del 1950 la propiedá de la factoría queda na figura de Nicanor Noval Hevia, armador de buques y propietariu de dellos negocios madereros.
Una vegada clausurada de forma definitiva la so actividá a lo primero de los setenta, el Conceyu de Xixón faise cola titularidá del complexu pa proceder, años depués, al esmantelamientu de bona parte de les sos dotaciones, dexando en pie la nave central de lladriyu, la chimenea y un fornu, asitiáu na trasera.
Rehabilitada a iniciativa municipal, siguiendo’l proyeutu redautáu pol equipo d’arquiteutos formáu por Indalecio Prendes, Fernando Meneses y Javier Uría de la Fuente, la vieya nave acondiciónase como centru d’empreses. Los trabayos d’afayamientu, desendolcaos ente’l 1990 y el 1992, constitúin ún de los más tempranos exemplos de reconversión d’un inmueble industrial qu’atopamos n’Asturies xunto cola tresformación de la centenaria Curtidora Maribona, n’Avilés –proyeutu llixeramente anterior– p’adoptar no qu’a usos nuevos se refier una solución asemeyada: la de viveru empresarial.
Dende la so inauguración nel añu 1993 hasta güei la vieya nave de lladriyu sigue felizmente funcionando como Centru Municipal d’Empreses.
GALERÍA D'IMAXES
Comentaris recents