Industries
L’entamu del sieglu XX supón pal campu la entrada definitiva na economía de mercáu, estrictamente capitalista y monetaria, suministrando a les ciudaes y árees industriales los productos que-yos yeren necesarios pero que nun podíen producir. La remolacha y el zucre, la mazana y la sidra, y la lleche y los sos diversos derivaos serán el vector d’esti cambéu n’Asturies y tresferirán rentes a un agro que les emplegaríen na so modernización, ameyoramientu y crecimientu. Les carreteres servirán pa drenar dalgunes d’estes producciones, como la lleche nel occidente costeru, pero será’l ferrocarril el que más vertebre y afale esta medría pola so mayor capacidá de carga y seguridá nos tresportes.
Un bon exemplu de too ello ye La Lechera de Cancienes, empresa creada nel 1907 na población homónima, perteneciente al conceyu de Corvera y asitiada sobre la lllinia ferroviaria d’anchu ibéricu abierta na década anterior, que permitía la conexón cola meseta. Un aspeutu importante, yá qu’esta compañía, entovía teniendo un área de recoyida reducida, utilizó’l so asitiamientu ferroviariu pa orientar la so producción llechera al mercáu de Madrid, onde abrió una delegación y llueu una tienda propia. Col tiempu, partiendo de la lleche, diría diversificando a lo llargo de la so historia la so producción, añadiendo la lleche condensao, la nata, el quesu, la mantega… Una evolución a la par del cambéu de propiedá que se produz tres la Guerra Civil y que fadrá que la compañía entre primero na esfera de la familia Rubio de Lleón, llueu a ALI, a la catalana Granja Castelló después y, finalmente, en Nestlé, que la pesllaría na década del 1980.
L’edificiu de la Lechera ye una construcción terrena, con amplia cubierta a dos agües que-y da un ciertu aire montañés qu’encaxa bien cola so función, pocos vanos y éstos compuestos por arcos rebaxaos con encintaos de lladriyu, ún d’ellos circular na fachada, mientres que’l restu del edificiu taba enllucíu en blanco. Acompaña’l conxuntu una chimenea de lladriyu cuadrangular.
Interviénose de recién nel inmueble pal so acondicionamientu como espaciu cultural polivalente.
GALERÍA D'IMAXES
Comentaris recents