Fábrica de Gas

Promovida nel 1857 pola Sociedad Alumbrado de Gas, la esplotación de la fábrica queda en manes, dende’l 1899, de la Sociedad Popular Ovetense, integrada n’Hidroeléctrica del Cantábrico-Saltos de Agua de Somiedo nel 1939. 

La fábrica agrupa instalaciones de calter productivu, empobinaes a la producción d’enerxía, llaboratorios pa control de productos, almacenes, depósitos de materies primes, talleres, dependencies alministratives y d’usu residencial, xunto con redes d’abastecimientu qu’enllacen la factoría cola ciudá d’Uviéu. La puerta d’accesu al recintu da una imaxe de prestixu a la fábrica. El so proyeutu débese a Miguel García Lomas y Somoano, correspondiendo la so realización a Francisco Casariego.

L’almacén de carbón, atribuyíu al inxenieru Sánchez del Río, ye una estructura singular de pilares y vigues de formigón armao, que s’organiza nun depósitu de combustible sirvíu por ponte grúa, un área pa la so calcinación en bateríes de cok y elementos pa la fabricación del gas. La execución cuidada de les escaleres y marquesines, acompásase col calter escultóricu de los elementos estructurales.

La intervención de Joaquín Vaquero Palacios faise ente los años 1933 y 1936. Proyeuta una serie d’edificios, asitiaos nel frente de la cai Paraíso, de calter alministrativu, residencial y almacenes. Ente éstos hai que solliñar la vivienda del direutor, allugada sobre una planta baxa destinada a almacenes, con accesu independiente, y con una fachada que se compón sobriamente. Tamién al diseñu de Vaquero se debe’l pabellón de servicios múltiples, con planta heptagonal irregular, desarrollada en dos plantes y un entepisu. Resulta especialmente sobresaliente la resolución de la fachada, en particular l’ángulu resueltu en curva, la cubierta plana con barandiella de remate, la marquesina de vuelu grande y el torrexón onde s’atopa la escalera.

Natalia Tielve García