La Casona

Dientro d’esi mesmu llote, al añu siguiente, axudicóse al contratista José Fernández Bayón la obra d’un edificiu de viviendes p’axentes, asitiáu al este de les víes d’Avilés.

Ye un inmueble d’amplies dimensiones y planta rectangular dividida en trés pisos amás d’un desván. La cubierta fíxose a doble vertiente, con teya plano y una ellaborada crestería cerámica. Les fachaes tán construyíes con murios de lladriyu visto con sillería nes zones de mayor relieve y divídense en tres cuerpos, ún central rematáu caún n’hastiales nes principales, y dos llaterales. La decoración concéntrase en ménsules y moldures nos dinteles de los vanos, bandes corríes separtando los pisos y pilastres nes esquines. Atopamos tamién un trabayáu aleru a base de fascies superpuestes.

Interiormente nel so orixe debió ser un dormitoriu formáu por cuartos individuales, accesibles per una escalera central, con zones comunes (comedor, llavabos) na planta baxa. Los ferroviarios facíen nueche nél según les necesidaes de serviciu y yeren atendíos por personal que s’encargaba de la cocina y la llimpieza. Posteriormente dividióse en delles viviendes, cambiando la distribución y orde de caúna d’ellas nos distintos pisos y, finalmente, vendíes a los sos ocupantes yá n’época de RENFE.

La estética d’esti edificiu ye asemeyada a la d’otres construcciones feches n’Asturies por esos mesmos años en puntos como Uviéu o Uxo, na so mayoría desaniciaes anguaño. Representa un casu mui interesante de cuartos pa ferroviarios, una tipoloxía antaño mui habitual nes estaciones de cierta importancia y de la que La Casona ye l’últimu representante que queda en pie n’Asturies.

Guillermo Bas Ordóñez