Llocomotora Felguera

A lo último del sieglu XIX l’aumentu del tráficu nestes víes impulsó l’adquisición de dos llocomotores de vapor, que s’encargaron a La Maquinista Terrestre y Marítima de Barcelona y llegaron nel 1896. Una d’elles bautizóse como LA FELGUERA, magar que más tarde’l so nome perdería l’artículu. Anque al principiu nun tuvo matrícula, tres la constitución de la SMDF nel 1900 correspondió-y el númberu 6.

Yera una pequeña llocomotora de dos exes, con cilindros y bastidor esteriores, un diseñu cenciellu y funcional que resultaba al empar novedosu dafechu, yá que foi una de les primeres máquines industriales diseñaes n’España. Posteriormente’l modelu diba repetise pa otres empreses, como Carbones Asturianos o Altos Hornos de Bilbao.

La FELGUERA tuvo destinada al serviciu interior de la fábrica de La Felguera, que posteriormente incluyó tamién el tráficu de los vecinos Talleres del Conde, adquiríos a la Compañía de Asturias. Nel añu 1961 pasó a manes d’UNINSA y tuvo en funcionamientu hasta lo último de la década de los años sesenta xunto con otres llocomotores de factura más moderna.

Depués de la so retirada del serviciu conservóse y unvióse a la factoría de Veriña pa ser colocada como monumentu nos sos xardinos, allugamientu nel que sigue anguaño, desgraciadamente nun llugar d’accesu restrinxíu. La so hermana ximielga, bautizada CORRIELLOS, tuvo la mesma suerte, pero se cedió al Muséu del Ferrocarril d’Asturies, onde actualmente ta a la espera de restauración.

Pol so diseñu singular y el so orixe, entrambes dos son importantes pieces del patrimoniu ferroviariu asturianu venceyáu a una de les sos empreses siderúrxiques más relevantes.

Guillermo Bas Ordóñez