Llocomotora Figareo

Ésti ye’l casu de la FIGAREDO, una máquina fabricada nel 1914 pola firma Krauss de Múnic que ye una versión dalgo mayor d’otros exemplares d’esi mesmu constructor como la UPINA. Al igual qu’ella, ye una llocomotora de dos exes acoplaes, con distribución esterior y tanque d’agua baxo’l bastidor.

Nel casu que nos ocupa encargóse nun momentu nel que les esplotaciones del valle de Riosa, depués d’unos entamos movíos, adquirióles de manera definitiva la empresa Hulleras de Riosa, que les caltendría hasta la so venta a ENSIDESA nel 1952. La máquina recibió’l númberu 4 y el nome FIGAREDO n’honor al empresariu Inocencio Figaredo, ún de los principales aicionistes del negociu.

N’orixe tuvo destinada a remolcar los trenes de vagonetes que circulaben pela trinchera del pisu 456. Esti ferrocarril enllazaba los planos inclinaos de la vertiente de Riosa colos que descendíen al llavaderu de La Perea al traviés d’un túnel baxo’l cordal hasta la mina Ana María. Por mor d’esta circunstancia presenta una cabina rebaxada, lo que-y da un aspeutu más potente respeuto a la so capacidá real.

Cuando, na década del 1920, esi ferrocarril principió a ser progresivamente esmanteláu, la Figaredo pasó a circular per otros pisos del complexu de trincheres de la marxe derecha del valle hasta la so retirada, metanes los años sesenta.

Quedó entós como monumentu nos xardinos del Pozu Monsacro, lo que garantizó la so sobrevivencia. Depués de munchos años ellí, nel 2005 los trabayadores de la esplotación minera rehabilitáronla y llegó a prendese en delles ocasiones, siendo capaz, magar l’estáu regular de la caldera, de movese polos sos propios medios, y inclusive rodó peles víes del Muséu del Ferrocarril d’Asturies. Sicasí, tornó al so llugar orixinal, nel que sigue güei.

Guillermo Bas Ordóñez