Llocomotora FL 46

Yá nos años 20, la empresa ferroviaria asturiana necesitaba sustituyir les sos llocomotores más vieyes por un modelu de mayor potencia y fiabilidá. Los responsables de la llinia habíen tar satisfechos col rendimientu de les americanes y, ente’l 1925 y el 1942, encargaron una docena de copies a la firma vizcaína Babcock & Wilcox. Llevaron los númberos 39 a 50, xusto depués de les sos hermanes yanquis, y conocierónse coleutivamente como ‘americanes’, por oposición a les máquines de procedencia belga adquiríes a lo primero del sieglu. La númberu 46 foi la última d’un llote de cuatro puestu en serviciu nel 1931.

Yeren llocomotores de trés exes acoplaes, con tanques llaterales y cilindros esteriores, modelu preferíu pol Ferrocarril de Langreo, yá que permitía facer tanto servicios de llinia como maniobres nos numberosos cargaderos de carbón del percorríu. Per décades formaron la base de la tracción del ferrocarril y emplegáronse indistintamente en trenes de mercancíes y de viaxeros.

Cola llegada de la tracción diésel metanes la década del 1960, la mayor parte de la serie desguazóse. Sicasí, dos exemplares conserváronse pa facer maniobres nes instalaciones del llavaderu de Carrocera, cerca de L’Entregu. Nesta situación pasaron a manes de FEVE nel 1972, momentu nel que se nacionalizó’l Langreo. Una d’elles foi la númberu 46, que sufrió un accidente pocu tiempu depués cuando perdió los frenos nuna maniobra y terminó estrellándose, quedando dañada na so zona posterior.

Darréu retiróse del serviciu y quedó abandonada en Carrocera, llugar nel que permaneció per un llargu tiempu hasta que se cedió al Muséu de la Minería. Anguaño ta dientro de les sos instalaciones, pero entá nun se rehabilitó.

Guillermo Bas Ordóñez