Llocomotora Pilar

Pa dar serviciu nesa llinia la SMDF heredó un heteroxeneu parque motor de les empreses qu’adquiriera, pero nun tenía un modelu de llocomotora realmente afayadizu. La situación solucionóse a partir del 1904 cola compra d’una nueva clase de máquina a la firma alemana Borsig. A lo llargo de los diez años siguientes punxéronse en funcionamientu siete exemplares del mesmu tipu. El quintu d’ellos llevó’l númberu 26 y el nome PILAR y entregóse nel añu 1912.

Ye un diseñu que combinaba les carauterístiques de los modelos del catálogu del fabricante pa responder a las necesidaes del cliente, tratando de maximizar la potencia ensin aumentar de manera escesiva’l tamañu nin el pesu. Contaben con dos exes motores y bastidor esterior; nos llargueros d’esti últimu taba asitiáu’l tanque d’agua.

Estes máquines alemanes ufrieron un serviciu escelente y convirtiéronse nel elementu más significativu del parque motor de Duro Felguera, y inclusive sobrevivieron a otres más modernes. La PILAR tuvo en funcionamientu nel Ferrocarril General hasta la so clausura hacia’l 1969 per parte d’HUNOSA. Depués circuló pel ramal de Carrocera al Pozu Venturo, que s’esmanteló al empar metanes los años 70.

Posteriormente unvióse a les instalaciones del Pozu Carrio, hasta que se cedió al Muséu de la Minería, que procedió a la so restauración cosmética. Anguaño espónse nel esterior de la institución entreguina como un exemplar clásicu de la tracción vapor nos ferrocarriles mineros del valle d’El Nalón, anque decorada con un color que nunca llució nos sos años de serviciu, yá que siempre tuvo pintada de verde.

Guillermo Bas Ordóñez