Una de les más habituales foi la combustión interna, utilizando tanto motores de gasolina como, especialmente, diésel, con distintos tipos de tresmisión (mecánica, hidráulica, llétrica) según el fabricante o’l cometíu de la propia máquina.
Anque apaecieron n’Asturies na década del 1910, nun se xeneralizaron hasta la del 1950, cuando apaecieron tanto en llinies de superficie como na mecanización de los arrastres nel interior de les mines.
Atopamos una gran variedá d’esti tipu de llocomotores, que coincide cola presencia de fabricantes diversos. Ente los más interesantes rescamplamos el tractor Hunslet entregáu nel 1948 a Carbones Asturianos, ún de los primeros usaos nos ferrocarriles mineros de superficie del valle d’El Nalón, con anchor de 650 milímetros y tresmisión mecánica.
De menor calibre ye’l pequeñu tractor Comessa, de construcción francesa y procedente d’Antracitas de Gillón, una de las escases pieces procedentes de la cuenca minera d’El Narcea.
L’amplia rede ferroviaria d’ENSIDESA tuvo esplotada dende los sos primeros tiempos con tracción diésel. De la gran variedá de llocomotores coles que contó la siderurxa pública rescamplamos el B-15, construyíu nel 1959 pola casa francesa Batignolles, un modelu clásicu de vía ancha que representa les carauterístiques de los fabricantes del país vecín.
El constructor xermanu Deutz foi otru gran protagonista dientro d’esti campu n’Asturies. De los sos talleres salió, nel 1964, una máquina de vía ancha bautizada GENERAL JIMÉNEZ ALFARO con destín a la rede interior de la Fábrica d’Armes de Trubia. Pertenez a un modelu normalizáu del fabricante, que tamién entregó un bon númberu d’exemplares pa les galeríes mineres asturianes.
La firma Deutz non solo construyó llocomotores, sinón que suministró motores a otros fabricantes. Ye’l casu de la empresa española Ferrotrade, allugada en Madrid, qu’entregó un exemplar a la térmica de Soto Ribera. Esta máquina llevó’l númberu 2 y presenta un diseñu d’inspiración alemana. Ye un peculiar esponente d’un constructor nacional mui poco conocíu.
Guillermo Bas Ordóñez
Comentaris recents