Mercáu d’Abastos

Industries

Mercáu d'Abastos

Mieres

L’importante aumentu de población remanecíu de la intensa actividá industrial del conceyu fai necesaria la organización del espaciu urbanu nos terrenos de la vega, que tendrá la so traducción nuna socesión d’enanches que s’amestarán a los núcleos fundacionales de Requexu, Oñón, Sobrelesvegues y La Villa.

El primeru d’ellos, nel arranque del sieglu XX, forma una cuadrícula na que se constrúin nos sos bloques un grupu d’edificios públicos que da respuesta a les necesidaes d’una población en crecimientu constante, como la casa consistorial, el grupu escolar Aniceto Sela o’l mercáu d’abastos.

Habilitar un llugar nel que poder facer, nes esixibles condiciones d’hixene y sanidá, la venta d’alimentos frescos movió a un grupu de conceyales a soscribir una moción nel 1904 na que se solicitaba la construcción d’un mercáu públicu. Esi añu Juan Miguel de la Guardia redautó’l proyeutu que siguirá la llinia de los que yá plantegara pal Mercado del Progreso d’Uviéu (1883), población onde ocupaba la plaza d’arquiteutu municipal, y el de Villaviciosa (1901). Les obres axudíquense al constructor José Miranda Antuña y nel 1907 faise la inauguración d’un equipamientu que’entá güei cumple la so función.

Ye un edificiu de grandes dimensiones qu’ocupa na so totalidá ún de los bloques del enanche mierense. La so planta ye rectangular y cúbrese a cuatro agües con un cuerpu sobreeleváu que permite la illuminación y ventilación del interior. Tien accesu nes sos cuatro fachaes, ocupando les puertes un llugar central en caúna d’elles. Compónense d’un arcu de mediu puntu sobre columnes corinties, pilastres con soperes y frontón. 

L’espaciu interior organízase per aciu d’un espaciu central y un pasillu que lu arrodia. Les firmes columnes metáliques, que tienen pola estructura de la cubierta del mesmu material, permiten la división d’esos espacios.

Mónica García Cuetos

GALERÍA D'IMAXES