Na sala de turbines de la Central de Salime atopamos dos de les intervenciones más interesantes: una composición xeométrica que reproduz la descarga llétrica ente dos polos y un gran frisu narrativu que da cuenta de la llaboriega esperiencia constructiva del saltu. La composición, a gran escala, esixe una llectura continua pa pescanciar el rellatu, la narración de los trabayos entamaos dende la xénesis del proyeutu hasta llegar a les aplicaciones de la lletricidá y de los sos protagonistes.
El rellatu plásticu arranca cola invención del saltu y la representación de los conseyeros de les empreses promotores –Hidroeléctrica del Cantábrico S.A. y Electra de Viesgo, S.A.– asina como de los inxenieros responsables de los estudios téunicos. A la síntesis de los trabayos constructivos –accesos, tresporte y edificios– siguen-y los obreros, protagonistes del tramu central del mural; sobrevuélalos la escena de la Pietá, na qu’una muyer apenada tien nos sos brazos a un obreru, en recuerdu de los finaos nes obres. Lo siguiente ye’l rellatu de los direutores y los artistes: el padre, Vaquero Palacios, representáu como escultor; el fíu, Vaquero Turcios, como pintor.
Más alantre, xunto a la alusión al añagamientu y el fundimientu de les finques y edificios preesistentes, son esquemáticamente reproducíos los elementos qu’integren el saltu: la presa, l’alliviaderu, la central, la subestación d’esterior, los grupos de turbina-alternador, los mandos y el tresformador. Remata’l mural col prendíu d’una bombilla y la producción de la enerxía, el calor, la fuercia, la lluz y les sos llinies de tresporte.
El resultáu ye una obra rotunda y equilibrada na que queden harmónicamente acompasaos verismu y simbolismu. El tratamientu dignu, severu y solemne de les monumentales figures, d’aspeutu épicu, la rotundidá plástica, la viveza cromática y intensidá emotiva déxennos enllazalu coles composiciones del muralismu mexicanu.
Natalia Tielve García
Comentaris recents