Nave de los Grupos Ilgner

A mediaos de la década del 1950 la empresa incorpora’l sistema Ilgner de tresformación pa garantizar el suministru de lletricidá a los trenes de llaminación, nel marcu d’un plan xeneral d’ameyoramientu de les sos instalaciones que contempla, amás, la entrada en funcionamientu de dos xeneradores de vapor Babcok-Wilcox, dos turboxeneradores Adamson, un tren de llaminación de cuatro cilindros de la casa alemana Demag, una batería de fornos Pits de fuexa y un grupu de fornos d’aceru Maerz.

Apegáu al Taller d’Axuste, l’edificiu acoyía l’equipu llétricu de Brown Bovery y los grupos Ilgner de la casa francesa Alsthon, xunto colos correspondientes paneles de mandos. Coneutábase coles naves de llaminación al traviés d’una ponte n’altura –qu’entovía se conserva– pela que pasaben los cables llétricos. De planta trapezoidal, desendólcase n’alzáu a una sola altura, asentada sobre suétanu. Incorpora como sistema de cubierta bóveda de formigón reforzada por faxones y pieces cerámiques. Una plataforma prauticable, colocada a media altura, apoyada sobre pilares de formigón y acotada por una barandiella, percuerre perimetralmente l’espaciu central.

Al esterior, los paramentos recubiertos con plaqueta de lladriyu harmonicen estéticamente col conxuntu d’edificios de la planta. Nellos ábrense vanos de dimensiones xeneroses, zarraos con vidros tresllúcidos que presenten particiones. Rescamplen n’alzáu dos torres de ventilación de seición cuadrangular, percorríes por barandielles y cubiertes por teyaos a cuatro agües. La puerta d’accesu al edificiu asítiase nel primer tramu de la fachada, de colocación horizontal. Atópase darréu un llenzu que combina muriu ciegu con güecos y, finalmente, un pañu ensin vanos que limita cola vieya sala de compresores.

Magar que l’edificiu de los grupos Ilgner ye una de les estructures que por fortuna se caltuvieron de les instalaciones de Duro Felguera, lo cierto ye que’l so estáu de conservación ye precariu enforma.

Natalia Tielve García