Los emplegaos distribuyíense ente’l pobláu d’A Paicega y el d’El Salto. El primeru, con una posición dominante sobre la presa, planificóse p’acoyer a doscientos moradores, repartíos en doce pabellones con trés viviendes caún –destinaes a los grupos familiares– y un Pabellón-Residencia. Xunto a los agospios organizáronse los equipamientos: ilesia, economatu, almacenes, panadería, peluquería, chigre, cuartel, central de tresformación y escueles pa neños y neñes.
Na falda del monte asítiase El Salto. Consta de cuatro edificios llevantaos a trés altures con agospios pa emplegaos, asina como cinco viviendes unifamiliares pa inxenieros. Contaba tamién con equipamientos sociales: capiella, bar, garaxes, almacenes, escueles de neños y neñes, salón-teatru-cine, Oficina-Residencia de la Comunidá, bolera y xuegos de rana y llave.
Frente al allugamientu privilexáu y meyores dotaciones de los emplegaos, los obreros asitiáronse na redolada del llugar del trabayu, nos poblaos d’El Segundo Plano, a media lladera del monte, y Eritaña, al pie de la presa. Integren El Segundo Plano seis pabellones llevantaos a doble altura, con una capacidá pa 1.200 trabayadores, con sales-dormitorios, cocines, comedor, capiella, chigre, barbería y salón-cine. N’Eritaña construyéronse cuatro pabellones de dos pisos, con capacidá pa quinientos homes y una capiella provisional.
A estos poblaos añádese’l de productores, en Grandas de Salime, proyeutáu pol arquiteutu Ignacio Álvarez Castelao, asina como la residencia de la Direición, tamién en Grandas al cuidáu de Joaquín Vaquero Palacios.
Natalia Tielve García
Comentaris recents