Minería
397790738
Bocamines del Grupu Mineru María Luisa
397790738
Pozu María Luisa
El Pozu María Luisa, afondáu a entamos de la década de los 40, caltién aspeutos identitarios de las mines de la Duro, como son un gran edificiu qu’asume delles funciones productives y alministratives, y qu’estéticamente son trataos con cuidáu y mimu. Pero incorpora innovaciones, como la soldadura no que será’l primer castillete llevantáu con esta téunica.
A mediaos de la década de 1910 la Sociedad Metalúrgica Duro Felguera (SMDF), plenamente asentada yá nel negociu hulleru, decide llevar alantre l’apertura de trés pozos verticales d’estraición al llau d’otres tantes esplotaciones mineres de monte. El primeru será’l Fondón, siguíu del Sotón, y el terceru había de ser el María Luisa. Sicasí, nel 1918 la compañía declara yá que s’aplaza la instalación del Pozu María Luisa “hasta que les circunstancias sían más favoratibles y se llogre l’aumentu de la población obrera”… Fora pol fin de la guerra n’Europa y la crisis permanente que s’instalará nes décadas siguientes, sía tamién por causes más complexes, lo cierto ye que’l María Luisa nun se terminará hasta’l 1943. Eso sí, cuando la Duro acometa esti pozu fadrálo, como cuasi siempre, deprendiendo del pasáu y avanzando hacia’l futuru.
N’efeutu, el pozu plantégase, como yá fixera n’otres instalaciones, con una pantalla edificatoria d’altísima calidá estética, con un tratamientu que recuerda la propia fábrica de La Felguera y les primeres incursiones mineres, qu’axunta tolos servicios del pozu, dende les oficinas, llavabos, almacenes o maquinaria, reduciendo los desplazamientos pela plaza. Pero amás, el castillete llevantaráse con una téunica nueva trayida d’Alemaña, la soldadura, qu’inaugura una era nueva nestes construcciones mineres y que ye, amás, la primer estructura metálica soldada d’España. Un castillete que quedaba envueltu d’un modernu taller de clasificación de carbones que, avanzando y ameyorando’l modelu del Sotón, aprovecha los desniveles del terrén nel so favor.
Pero si por dalgo ye famosu’l pozu ye por un cantar y un accidente… El 14 de xunetu del 1949 produzse un españíu de grisú nel que 17 mineros pierden la vida. La canción ‘Santa Bárbara bendita’ sería adaptada a partir d’entós pa recordar esta traxedia, pasando a conocese como ‘Nel Pozu María Luisa…’.
Nel 1967, xunto col restu de la rama minera de la Duro, el Pozu María Luisa pasaría a manes de la empresa estatal HUNOSA, que pesllaría la so actividá estractiva nel 2016. Parte de les sos instalaciones siguen actives como auxiliares de los pozos Sotón y Samuño.
GALERÍA D'IMÁXES
Comentaris recents