Minería
Los ricos xacimientos d’hulla del valle d’El Río Candín, na parroquia llangreana de La Venta, esplotáronse dende la segunda década del sieglu XIX, nun primer momentu en manes d’Alejandro Aguado, marqués de las Marismas, que promueve nel 1925 la Sociedad Minas de Carbón de Siero y Langreo. Más tarde será Fernando Muñoz y Sánchez, duque de Riánsares y esposu de la reina rexente María Cristina, el que se faiga con estes esplotaciones. Empeñáu n’estender los sos intereses mineros pelos valles d’El Caudal y d’El Nalón, Muñoz adquiriera la empresa constituyida nel 1844, Asturian Mining Company o Compañía Anglo Asturiana, qu’intentara ensin ésitu la puesta en marcha d’una factoría siderúrxica en Mieres. Finalmente, tres un nuevu intentu fallíu de la empresa creada por Muñoz y los sos socios, la Compagnie Minière et Métallúrgique des Asturies, será l’empresariu francés Numa Guilhou’l que llogre consolidar el proyeutu que nel 1879, cola direición del inxenieru Jerónimo Ibrán, recibe’l nome de Fábrica de Mieres.
Nel 1918 Fábrica de Mieres entama les obres d’afondamientu del Pozu San Enrique o Candín, que se verán interrumpíes poco después, seguramente poles dificultaes económiques poles qu’atravesaba la empresa. Nel 1925 la esplotación pasa a manes de la Sociedad Minas de Langreo y Siero, que se fai con parte de les concesiones de la empresa de Guilhou.
Nel 1929 retómense los trabayos, que terminen na década siguiente. El castillete móntase nel 1933, anque se reformará nos años sesenta, xunto cola máquina d’estraición y los compresores. D’esa primer fase constructiva consérvase l’edificiu destináu a taller y fragua, los qu’acueyen la sala de compresores, les calderes y la central, y l’edificiu del ventilador. Nel 1942 constrúise l’edificiu d’oficines, diseñáu polos Hermanos Somolinos; nel 1957, la casa de baños; y na siguiente década’l conxuntu de castillete, casa de máquines y pabellón d’embarque.
Llueu de la incorporación n’HUNOSA’l Pozu San Enrique o Candín II reafondóse y coneutóse col Pozu Santa Eulalia o El Cabritu (Candín I) y col Pozu Fondón al traviés d’una galería de 1,5 quilómetros per debaxo d’El Río Nalón. N’avientu del 2012 cesa la so actividá.
GALERÍA D'IMAXES
Comentaris recents