Pozu L’Entregu

La posibilidá de beneficiar les vetes perbaxo del nivel de los valles abría campos d’esplotación nuevos más provechosos, pero tamién esixía una inversión mayor que namái nel entamu del sieglu XX les empreses taben dispuestes y capacitaes p’asumir y, tamién, pa rentabilizar, nun puxante mercáu rexonal, nacional y, inclusive, internacional. 

La historia del Pozu Entrego ye la de la evolución teunolóxica de les mines asturianes, tímida, sele, pero siempre hacia alantre. Asina, el primer pozu vertical de les cuenques taría servíu hasta’l 1926 por un castillete de madera y un cenciellu cabestrante. Nesa fecha simplemente añadiríense unes tornapuntes al castillete, que nun se cambiaría hasta entrada la década de 1940, cuando s’igüó ún de celosía metálica roblonada pa servir a una moderna máquina d’estraición de vapor. Una década más tarde la máquina pasa a ser llétrica, y poco más tarde un castillete nuevu incorpora yá la soldadura. Cotes d’afondamientu nueves encamiemten una máquina d’estraición nueva qu’acabará siendo una de polea Koepe –una de les primeres d’Asturies– suministrada por GHH y Siemens. 

Dende’l 1958 la mina complétase con un llavaderu pequeñu que se remocica a partir de los años sesenta. Y ye que la innovación foi una constante en L’Entregu: casa de máquines nueva; maquinaria nuevo, como los compresores, de les firmes Worthingthon y Ingersoll, vitales pal arranque por martillos neumáticos; la primera llocomotora llétrica del tipu BARTZ, los primeros embarques neumáticos.

En definitiva, la mina Entregu pasó a la historia minera pola so apertura vertical temprana, pero ello desdibuxó les esperiencias y vitales avances que se punxeron en marcha nun familiar, cuasi caseru, pequeñu gran pozu d’una pequeña ciudá de l’Asturies más minera.

Faustino Suárez Antuña