Pozu Figaredo

La esplotación organizábase per aciu de pisos de monte coneutaos ente ellos con planos inclinaos y cola zona onde s’asitiaba’l taller de clasificación y llaváu, amás de fornos de coque na población de Cortina.

Nel 1932 la empresa familiar Viuda e Hijos de Inocencio Fernández pasará a nomase Minas de Figaredo, S.A.

Al empar que siguía cola esplotación de les sos mines de monte, la empresa diseñó un gran campu d’esplotación nes cercaníes de Figareo, qu’incluyó dos pozos verticales y una fábrica de subproductos.

L’afondamientu del primeru d’ellos, el Pozu San Vicente, entámase nel añu 1929 aunque la finalización de les obres nun se produz hasta la década de los cuarenta. Los reafondamientos fechos na década del 1980 esixeron la sustitución del castillete vieyu pola torre d’estraición actual. El pozu llegó a algamar una fondura de 500 metros.

El segundu d’ellos, el Pozu San Inocencio, alcanzó los 470 metros de fondura en diez plantes. El so castillete, de 31 metros d’altor, construyólu la Fábrica de Moreda-Gijón y instalóse nel 1957 pa comenzar la producción un añu más tarde. Nesti tiempu proyeutáronse una bona parte de los edificios conservaos: casa de máquines (1955), oficines (1956), casa de baños y llampistería (1960).

A lo último de la década del 1970 Minas de Figaredo pasó per una fonda crisis que dio na presentación d’un espediente de regulación d’emplegu pa los sos 1.650 trabayadores. Tres una intensa llucha sindical y social, incluyida una manifestación en Mieres a la qu’asistieron 40.000 persones n’abril del 1979, la empresa integróse nel Instituto Nacional de Industria. Nel 1998 incorpórase n’HUNOSA, siendo la última empresa en facelo.

Les sos instalaciones piesllen de manera definitiva nel añu 2007.

Mónica García Cuetos