Pozu Modesta

Minería

Pozu y Llavaderu de Modesta

Sama, Llangréu

L’allugamientu de Modesta en Llangréu ye ún de los espacios de la hulla qu’esperimentó unos cambios más intensos a lo llargo del sieglu XX llavando y produciendo carbón pa España. 

Dende’l cuartu últimu del sieglu XIX operaba una pequeña mina de carbón, la Perezosa, qu’esperimentó yá cambios en manes d’Herrero Hermanos al coneutala col restu de les sos esplotaciones en Llangréu y Samartín. La integración d’esta compañía na Sociedad Metalúrgica Duro Felguera, nel 1902, nun fixo otra cosa qu’incrementar la tresformación del sector. La so situación sobre la vía ferroviaria de la Compañía del Norte y la cercanía a la mina La Nalona –pronto afondada pa dar llugar al Pozu Fondón– foron los axentes del cambiu. Modesta creció entós como mina y como espaciu pal llaváu de la hulla de bona parte del Grupo Sama: más de 130.000 tm nel 1923, una producción mui superior a la mayor parte de les empreses y pozos de tamañu mediu. La mina dotóse con servicios nuevos: bocamina (1911), llaboratoriu y sala de compresores y ventilador, instalaos n’edificios de gran asemeyanza a los que se llevantaben de forma paralela n’El Fondón, sicasí con dimensiones más conteníes. Pa la preparación de la hulla reformóse nel 1909 el llavaderu con una nueva trayida d’agua y construyóse nel 1910 un magníficu túnel de conexón con La Nalona. Finalmente, nel 1957, la mina afondóse dando llugar al Pozu Modesta, llevantándose entós edificios nuevos, como la casa de máquines, obra del arquiteutu Julio Galán. 

La integración de la Duro n’HUNOSA nel 1967 implicó tresformaciones nueves en Modesta, pasando a acoyer un gran llavaderu central pa la preparación del mineral de les esplotaciones de la empresa n’El Nalón. Nesti contestu nuevu’l pozu cesa la so actividá nel 1975 y constúise una mui complexa instalación soterraña con galeríes nueves, pozos internos de depósitu y quilómetros de cintes tresportadores que llevaben la hulla de los pozos de Samartín y Llangréu al nuevu y modernu llavaderu. Nel 2007 una quema aceleró’l pieslle de la instalación. Dos años más tarde principiaron los valtamientos, de los que namái se salvaron el castillete, restauráu pol arquiteutu Miguel García Pola nel 2018, y dalgunos de los edificios del entamu del sieglu.

Faustino Suárez Antuña

GALERÍA D'IMAXES