Minería
Llueu de la construcción del Pozu Santa Bárbara, la empresa Hulleras de Turón acomete a lo último de la década del 1920 un afondamientu nuevu p’ameyorar el llaboríu d’otros sectores de les sos concesiones nel valle: el Pozu Espinos. Esti pozu va tar sirvíu por una singular estructura d’estraición que foi incluyida de manera acertada dientro de la categoría de les torres d’estraición.
Les torres presenten como principal diferencia con respeuto al castillete que la máquina d’estraición s’asitia no alto de la propia estructura y non en suelu. Nel casu d’Espinos, la caseta qu’agospia la cenciella máquina ye de tablones de madera y vidru nes ventanes con teyáu a dos agües, y sostiénse sobre unos apoyos de celosía roblonao que la coloquen sobre’l brocal del pozu. P’acceder a la mesma esiste una escalera tamién metálica col anagrama de la empresa promotora nos peldaños.
El Pozu Espinos ye una modesta pero guapa estructura qu’antecede cuasi mediu sieglu a les imponentes torres brutalistes de la minería de la hulla, de les qu’hai un exemplu nel entamu del valle de Turón, el Pozu San Vicente en Figareo.
GALERÍA DE IMAXES
Comentaris recents