Pozu Llamas

Minería

Pozu Llamas

Ablaña, Mieres

Los cotos mineros d’Ablaña yeren oxetu de trabayu dende, pelo menos, el terciu últimu del sieglu XIX, beneficiando un productivu xacimientu que s’estendía contra’l conceyu de Riosa. Primero, per aciu de mines de monte, la empresa Mina Llamas intentaría llueu la so explotación al traviés d’un pozu planu abandonáu énte l’afondamientu d’un pozu vertical d’estraición de trés plantes y ciento trenta metros abiertu nel 1941 baxo’l nome de San José.

Dos años depués la empresa ye absorbida pola minerometalúrxica cántabra Nueva Montaña Quijano, que reafondaría la esplotación algamando cien metros más. P’atender les cotes nueves de fondura, la empresa hebo de sustituyir el pequeñu castillete fundacional montando ún práuticamente idénticu, pero de mayor tamañu, dambos construyíos nos talleres de la cercana Fábrica de Mieres. El castillete orixinal sería alquiríu una década más tarde pola Empresa Nacional Siderúrgica (ENSIDESA) como castillete d’afondamientu pal Pozu Monsacro, siendo esmanteláu en cumpliendo esta postrer función. 

Los castilletes de Llames constitúin un casu mui singular dientro d’esti tipu de construcciones: de celosía d’aceru roblonao, la so peculiaridad mayor ta na posición del castillete respeuto a un brocal que nun llega a superar y enmarcar col habitual caxón d’aceru. Asina, colócase en voladizu sobre’l pozu con dos únicos pies derechos, de mou que los cables colgaben de les polees por fuera de la estructura del castillete, creando una imaxe de cierta elegancia y una inestabilidá sólo aparente. Pa llograr l’equilibriu, los dos pies derechos son arriostraos poles tornapuntes, con una densa obra de celosía de gran guapura y complexidá qu’entá anguaño podemos almirar. Por mor de les sos carauterístiques, la máquina d’estraición asitiábase nuna posición elevada dientro de la casa de máquines pa llograr el necesariu ángulu de tracción de les xaules.

Nel 1967 Nueva Montaña integra la esplotación d’Ablaña n’HUNOSA, que caltién la so actividá hasta metanes la década del 1970. Dende entós el pozu entama un procesu de deterioru qu’acabará esborriando un valiosu testimoniu de la intensa actividá minera d’esti valle d’El Caudal.

Faustino Suárez Antuña

 

GALERÍA D'IMAXES