Pozu San Antonio

Minería

Pozu San Antonio

Morea, Ayer

La Hullera Española, creada nel 1892 por Claudio López Bru, segundu marqués de Comillas, pa desendolcar de manera conveniente les mines d’hulla adquiríes pol so padre Antonio López n’El Río Ayer, desarrolló una intensa organización territorial na que los trabayos estractivos s’asitiaben na parte media alta del valle, l’espaciu de residencia d’empresa nel tramu mediu y la xestión alministrativa y la salida del carbón na baxa, na confluencia con El Río Caudal.

Nun será hasta la década del 1940 cuando la Hullera faiga’l cambéu de minería de monte a pozos verticales, aguiyaos pol favoratible contestu autárquicu de la dictadura militar, n’íntima connivencia siempre col empresariáu minero, que-y permitía siguir cola so práutica de compensar la falta de reinversión de capital col trabayu d’una clase obrera vencida y medranosa de la ríxida tríada franquista: Empresa, Estáu y Ilesia. Y ye que les estrictes regles morales que’l segundu marqués impuso no que funcionaba como’l so feudo –treslláu d’un propiu y intensu caráuter piadosu al más puru estilu de la burguesía española– onde’l control clerical yera absolutu, motivó qu’a la Hullera se la denominare, con aciertu, como’l ‘Cotu de Dios’.

El Pozu San Antonio, asina nomáu n’alcordanza del primer marqués, afóndase a partir del 1942 con munchu trabayu y una pequeña formigonera, siendo visitáu nel 1946 por Juan Antonio Suanzes, ministru d’Industria, que baxa al so interior. El so primer castillete será proporcionáu pola Duro Felguera –xunto con una empresa francesa– na moderna téunica de soldadura metálica que la firma llangreana llevaba desendolcando dende lo primero de la década, diferenciándose yá del Pozu San Jorge, tamién de la Hullera, llevantáu en celosía roblonao. 

Nel 1967 la Hullera Española intégrase n’HUNOSA, que reformará San Antonio con un añadíu al castillete pa servir a la única máquina d’estraición de polea cuadricable que llegó a montar la empresa estatal, lo qu’esixó una nueva casa de máquines. Nel 1994 el pozu dexa de tener funciones estractives, concentrando la salida del carbón pela unidá Santiago-San Jorge, y nel 2003 pieslla les sos puertes de manera definitiva. 

Faustino Suárez Antuña

GALERÍA D'IMAXES