Pozu Samuño

Nel 1907 el popular empresariu vascu Horacio Echevarrieta alquirió estos cotos, que, al empar, a partir del 1923, quedaron baxo’l control de Catalana de Gas y Electricidad, que basaba’l so negociu na utilización de la hulla pa la fabricación de gas d’allumáu y llueu pa la xeneración d’enerxía llétrico. Acordies con ello, el llar social de la mina asturiana cambió a Barcelona, onde tuvo hasta la so integración n’HUNOSA nel 1967.

Hasta l’autarquía la concesión beneficiábase per aciu mines de monte, configurando un paisaxe mui asemeyáu al retratáu polos fotógrafos Hauser y Menet a lo primero del sieglu XX na parte media-alta del valle. L’afondamientu del Pozu Samuño, que cesaría la so actividá n’avientu del 2001, permitió’l trabayu del xacimientu per baxo del nivel del valle, magar que la minería en lladera se caltuvo per aciu contratos d’arrendamientu hasta los años cincuenta.

El pozu acueye una llamativa coleición d’edificios y estructures mineres que permite observar la evolución d’un espaciu singular, empecipiando pola bocamina, que data del 1892, como diz na so clave qu’amiesta la fecha concreta: 26 de xineru. La casa de máquines, de la época d’afondamientu, ye un edificiu infrecuente onde la solución de cubierta, con faldones rotos y aleros mui pronunciaos, asina como les moldures de les esquines y la llinia d’imposta, recuerden de manera inmediata al neorrexonalismu, mientres que los vanos, de lluces mui amplies y perfiles rectos, tienen un sabor racionalista, un movimientu qu’algamará la so espresión máxima na casa de baños, fecha nel marcu de les fuertes inversiones entamaes por HUNOSA, que presenta planta circular, con una escalera n’espiral que vertebra tol inmueble. El castillete actual montóse nel 1985 con una imaxe inconfundible derivada de les sos polees coplanaries, que servíen a una máquina de polea Koepe de fabricación italiana regulada por un Grupu Ilgner.

Faustino Suárez Antuña