Minería
A lo primero del sieglu XX créase la empresa Antracitas de Viñón per parte de conocíos industriales rexonales y foranos con negocios n’Asturies, como Luis Belaunde, aicionista y presidente del Crédito Industrial Gijonés, o’l vascu Francisco Elorduy, propietariu de les Minas del Rimadero en Samartín del Rei Aurelio.
A lo llargo del sieglu XX la empresa pasará per distintes manes y denominaciones hasta que, nel 1953, entra na esfera de González y Díez. Conocedor del negociu mineru, yá que yera propietariu d’Antracitas de Tineo y de Minas de Lieres –heredera de la antigua Solvay–, González y Díez fadrá importantes inversiones na mina cabraniega: el tresporte del mineral pasará definitivamente a la carretera –tres llegar a ser lleváu en carros hasta El Puntal o La Espuncia, en Villaviciosa– y abandonará de manera defintiva la minería de monte faciendo un pozu planu nel que s’inscribe’l castillete que nos ocupa. Ye, poro, el castillete de Viñón una estructura cola función de llevantar la maquinaria d’estraición que servía al pozu planu, guardándola nuna caseta asitiada sobre murios de mampostería de piedra. Asina, pue esti castillete encuadrase na tipoloxía de castillete de fábrica de piedra o, nesti casu, de fábrica mesta de piedra y lladriyu.
El castillete de Viñón ye l’únicu testimoniu de la minería carbonera del área, que tuvo activa hasta’l 1969 trabayando con cierta intensidá un afloramientu carboneru que ye prollongación septentrional de la Cuenca Hullera Central. El restu de les instalaciones valtáronse.
GALERÍA D'IMAXES
Comentaris recents