Rula de Xixón

La historia de la Rula ta venceyada a la Sociedad Florencio Valdés y Cía. que, constituyida por navieros y comerciantes llocales, se convierte nel 1871 nuna de les principales concesionaries particulares del puertu. Ente les dotaciones de la sociedá s’alcontraben un edificiu destináu a Aduana que, a partir del 1904, se dedica a la puya del pescáu. Establécese asina la primer rula operativa nel puertu xixonés.

La esplotación de la Rula asuménla delles entidaes a lo llargo de la so historia: dende la sociedá benéfica Euskeria hasta la Cofradía de Pescadores Virgen de la Soledad, pasando pola Sociedad Sánchez de León y Cía., el Gremio de Pescadores El Germinar y, particularmente, la Unión de Armadores de Buques Pesqueros, que tuvieron al so cargu los trabayos de la Rula per décades.

Nún de los tinglaos del edificiu entra en funcionamientu, nel 1920, una fábrica de xelu. Ábrese entós una etapa d’esplendor, venceyada col apoxéu de la industria pesquera llocal y cola modernización del sector de les conserves. Parcialmente destruyida na Guerra Civil, la Rula reedificóse en parte n’acabando la guerra.

Na década del 1980 tómase la decisión de concentrar l’actividá pesquera nel Puertu d’El Musel y de construyir equipamientos nuevos destinaos a rula y fábrica de xelu, inauguraos nel 1987. Tres la clausura de l’antigua Rula dan entamu los trabayos pa la rehabilitación y dotación d’usos nuevos: el bloque central ocúpase por dependencies alministratives del puertu deportivu, ún de los tinglaos reconviértese en sala d’esposiciones y l’otru destínase a servicios d’hostelería.

Natalia Tielve García