Fábrica de Sidra El Gaitero

Amás, el crecimientu de las ciudaes al calor de la industria rexonal a lo último del sieglu XIX afaló la producción de distintos productos que los sos habitantes yá nun podíen facese con ellos polos sos medios como nel ámbitu rural, y, dalgunos, como la sidra, esperimentaron un consumu creciente nel nuevu contestu urbanu y social. Finalmente, la reapertura del fluxu migratoriu a ultramar, onde colonies d’asturianos foron afincándose en distintos países americanos, completó la creciente demanda de productos asturianos y, ente ellos, la sidra. 

P’atender esti consumu foron numberosos los llagares y fábriques de sidra que nacen nel periodo que va hasta’l fin de sieglu, rescamplando ente toes El Gaitero, en Villaviciosa, que s’especializaría aína en sidra esplumoso –entós denominada sidra champagne– pal mercáu americanu, siendo güei ún de los mayores productores mundiales.

La empresa Valle, Ballina y Fernández, constituyida nel 1890 y tresformada en sociedá anónima col cambiu de sieglu, llevantará la so fábrica nun porréu o terrén ganáu a la ría –asemeyao a los pólder neerlandeses– onde sigue produciendo anguaño. Con una bona llocalización sobre la carretera nacional que vertebra la costa asturiana, y cola posibilidá de dar salida a la so producción per un cai propiu, la fábrica dirá ganando entidá, llegando a producir les sos propies botelles a partir del 1915, cola chimenea como testimoniu que constitúi un auténticu iconu de la planta. Completen el conxuntu les naves de receición, tratamientu, almacenamientu…, y l’edificiu d’oficines, del 1900, que llueu se conformó como la cara más pública de la empresa, con un tratamientu cuidáu alternando la mampostería enllucida cola sillería nos esquinales y el lladriyu visto nos encintaos de los vanos.  

Un escelente y cuidáu patrimoniu d’una marca, El Gaitero, que, como dicía’l so más famosu eslogan, yera conocida nel mundu enteru.

Faustino Suárez Antuña