Subestación Llétrica

Ye’l casu de l’asitiada nes cercaníes de les naves de llaminación en caliente, que daba serviciu a estes instalaciones terminaes nel añu 1959.

Magar que nun conocemos la so autoría, esta construcción guarda importantes asemeyances formales cola propia central térmica de la factoría. Rescampla la so fachada principal, orientada al sur, que ta configurada por grandes ventanales colocaos en trés de les sos cuatro altures, potenciando la so horizontalidá. Na so parte izquierda  sobresal visualmente un gran módulu con zarramientu frontal vidrosu, adelantáu con respeuto a la fachada y de mayor altura que’l restu del edificiu.

A pesar del so interés arquiteutónicu, la subestación llétrica de llaminación en caliente cayó nel escaezu y nun cuenta, anguaño, con nengún tipu de proteición patrimonial.

Rubén Domínguez Rodríguez